කළු පෙට්ටිය කිව්වාට……………දන්නවා ද වටිනාකම?

ඇත්ත වශයෙන් ම කළු පෙට්ටිය ලෙස හඳුන්වන්නේ උපකරණ දෙකකට ය. ඒවා නම් පියාසර දත්ත රෙකෝඩරය (FDR) සහ නියමු කුටියේ හඬ පටිගත කිරීමේ යන්ත්‍රය (CVR)යි. ඕස්ට්‍රේලියාව ගුවන් යානාවල පියාසර රෙකෝඩර භාවිතය අනිවාර්ය කළ පළමු රට බවට පත් විය. ඒ 1958 දී ය. FDR විසින් උන්නතාංශය, ගුවන් වේගය, සිරස් ත්වරණය, ශීර්ෂය සහ තවත් බොහෝ දත්ත වාර්තා කරයි.

පියාසැරි දත්ත රෙකෝඩරය (FDR)-

පියාසැරි දත්ත පටිගත කිරීමේ සංකල්පය 1950 ගණන්වල සිට ආරම්භ වී තිබේ. ඕස්ට්‍රේලියානු විද්‍යාඥයෙකු සහ ඉංජිනේරුවෙකු වන ආචාර්ය ඩේවිඩ් වොරන් හට පියාසර පටිගත කිරීමේ යන්ත්‍රය සොයාගැනීමේ ගෞරවය හිමි වේ. 1953 වසරේ ලොව ප්‍රථම වාණිජ ජෙට් ගුවන් යානා අනතුර (de Havilland Comet ) සිදුවීමෙන් පසුව, Dr. Warren විසින් අනතුරුවලට හේතුව සොයා ගැනීමට උපකාර වන පියාසැරි දත්ත සහ නියමු කුටියේ සංවාද යන දෙකම පටිගත කළ හැකි උපකරණයක අවශ්‍යතාවය හඳුනා ගන්නා ලදී.

(CVR)-

නියමු කුටියේ හඬ පටිගත කිරීම FDR සමඟ යෙදවියයුතු අත්‍යවශ්‍ය අංගයක් බවට පත් විය. එය නියමු කුටියේ ඇති ශ්‍රව්‍ය සංවාද සහ අනෙකුත් ශබ්ද පටිගත කරයි. අනතුරට ආසන්න අඩ පැයක  සන්නිවේදනයන් දැනගැනීමට සහ ඊට අදාළ සිදුවීම් අවබෝධ කර ගැනීමට පරීක්ෂකයින්ට මෙය අතිශය වැදගත් වේ.

FDR සහ CVR යන දෙකෙහිම භාවිතය සම්බන්ධ රෙගුලාසි ක්‍රමයෙන් ජාත්‍යන්තරව සම්මත කරන ලද අතර බොහෝ රටවල් ගුවන් යානා සඳහා ඒවා අනිවාර්ය කර ඇත.

“කළු පෙට්ටිය” යන යෙදුම මදක් වැරදි නාමයකි. මෙම උපකරණවල අභ්‍යන්තර ක්‍රියාකාරිත්වය අභිරහස් සහ පහසුවෙන් තේරුම් ගත නොහැකි ය යන හැඟීමෙන් මෙම නම ආරම්භ වී ඇත. කාලයාගේ ඇවෑමෙන්, අනතුරු විමර්ශන සඳහා වටිනා දත්ත සැපයීම, සිදුවීම්වල මූල හේතු හඳුනා ගැනීමට මෙය අත්‍යවශ්‍ය විය. වර්තමානය වන විට ගුවන් ගමන් ආරක්ෂාව වැඩිදියුණු කිරීම සඳහා කළු පෙට්ටිය තීරණාත්මක කාර්යභාරයක් ඉටු කර ඇත.