දඹකොළපටුන /ජම්බුකෝළපට්ඨන

ජම්බුකෝළපට්ටන/ සම්බිලිතුරෙයි-ලංකාවේ වඩාත් මබ උතුරට වන්නට පිහිටි ප්‍රමුඛපෙළේ වරායකි. අනුරාධපුර අගනුවර හා මේ සම්බන්ධ කළ පැරණි ප්‍රධාන මාර්ගයක් වූ බවට මහාවංසය, ෆාහියන් හිමියන්ගේ වාර්තාව වැනි සාහිත්‍ය මූලාශ්‍ර වලින් පෙනී යන නිසා මේ වරාය අනුරාධපුර සමයේ දී මහාතිත්ථය තරම් ම වැදගත් වරායක් වන්නට ඇති බව පෙනෙයි. මිහිඳු මාහිමියන් ලංකාවට වැඩම කළේ මේ වරාය ඔස්සේ යැයි මතයක් තිබුණ ද, සාහිත්‍ය මූලාශ්‍රය වල මහින්දාගමනය හා සම්බන්ධ කොට ඇති මිත්‍යා කතා නිසා එහි සත්‍යාසත්‍යතාව සැඟවී ගොසිනි. කෙසේ වුව ද අශෝක රජුු හමු වීමට යෑම පිණිස තිස්ස රජුගේ නියෝජිත පිරිස නැව් නැංගේ මේ වරායෙන්ය යන්න පිළි ගැනීමට ප්‍රමාණවත් සාධක තිබේ. සඝමිත්තෙරණිය ශ්‍රී මහා බෝධි දක්ඛිණ ශාඛාව රැගෙන ලංකාවට වැඩම කළේ මේ වරාය ඔස්සේ බැව් යන්න ද පැහැදිලිය. එහෙත් ඒ කාලය වන විට මේ වරාය නෞකා මගින් වෙළඳකටයුතු සිදු කළ ස්ථානයක් වශයෙන් ජැටි ආදිය සකසා සංවර්ධනය වී තිබුණේ ද යන්න සැක සහිතය. ඊට හේතුව සඟමිත් තෙරණිය පිළිගැනීම සඳහා දේවානම්පියතිස්ස රජු කරවටක් දියේ බැස යාත්‍රාව අසලට ගිය බව සඳහන් වීමයි. ශ්‍රී මහා බෝධි ශාඛාව රැගෙන ඒමට පෙර මෙහි මණ්ඩපයක් තනවා බෝධි ශාඛාව රැගෙන එනතුරු රජු පෙරමග බලා සිටි බව ද, බෝධි ශාඛාව රැගෙන ආ පසුු දේවානම්පියතිස්ස රජු මේ ස්ථානයේ වූ මණ්ඩපයේ එය වඩාහිඳුවා තමා එහි ද්වාර පාලක වශයෙන් කටයුතු කළ බව ද ඒ ආසන්න කාලයක දී ම මේ ස්ථානයේ ජම්බුකෝල විහාරය කරවූ බව ද සඳහන් ය. ඉන්දියාවේ තාම්‍රලිප්ති වරාය තෙක් ගමන් කළ ලාංකිකයෝ බොහෝ විට භාවිත කළේ ද මේ වරායයි.

Share with a student

මේ සිතියම ඇතුළු සම්පූර්ණ සිතියම් පොත PDF එකක් ලෙස මෙතැනින් ලබා ගන්න

සම්පූර්ණ ලෝක සිතියම් පොත PDF එකක් ලෙස මෙතැනින් ලබා ගන්න

මේ සිතියම ඇතුළු සා.පෙළ ලංකා සිතියම් පොතේ මුද්‍රිත පිටපතක් මිල දී ගැනීමට මෙතැනින් පිවිස අපට Whatsapp කරන්න