ජාතිය සහ ජනවාර්ගිකත්වය සමඟ රාජ්‍යය සතු සම්බන්ධතාව

ජාතිය සහ ජනවාර්ගිකත්වය සමඟ රාජ්‍යය සතු සම්බන්ධතාව විස්තර කරන්න.

අභිමතාර්ථ :

මෙම ප්‍රශ්නය මඟින් අපේක්‍ෂා කරන්නේ විභාග අපේක්‍ෂකයින් සතු (අ) රාජ්‍යය, ජාතිය සහ ජන වාර්ගිකත්වය අතර පවතින අන්තර් සබඳතාව පිළිබඳ දැනුම සහ  (ආ) දේශපාලන විද්‍යා සංකල්ප එම අන්තර් සබඳතාවය විස්තර කිරීමට ඇති හැකියාව ඇගයීම යි.

පිළිතුරේ අන්තර්ගත විය යුතු විෂය කරුණු

• රාජ්‍යය, ජාතිය සහ ජනවාර්ගිකත්වය අර්ථ දැක්වීම.
• නූතන ජාතික රාජ්‍ය තුළ ජනවර්ග, නැතහොත් ජනවාර්ගික කණ්ඩායම්, කිහිපයක් ම සිටිය හැකි බව දැක්වීම.
• ජාතික සමගිය ගොඩ නැගීමේ දී රාජ්‍යය සතු කාර්යභාරය පෙන්වා දීම.

හැඳින්වීම :

හැඳින්වීමේ දී, ජාතිය සහ ජනවර්ගිකත්වය රාජ්‍යය සමඟ පවතින සබඳතාව පිළිබඳව සහ එය නූතන ජාතික රාජ්‍යය පිළිබඳව අධ්‍යනයේ දී ප්‍රධාන කලාපයක් නියෝජනය කරන බව දැක්විය හැකිය. මෙයට හේතුව නම්, ජාතීන් සහ වාර්ගික කණ්ඩායම් යනු මානව සමාජයන් හි වඩාත් මෑතකාලීන සංවර්ධනයන් වීමය.

තොරතුරු, විෂය කරුණු සහ සාකච්ඡාව :

1. රාජ්‍යය සහ ජාතිය ඉතාමත් සමීප වශයෙන් එකිනෙක හා සම්බන්ධ වී ඇත. බොහෝ රාජ්‍යයන්ගේ නිල නාමය ජාතියේ හෝ ජාතික ප්‍රජාවගේ අනන්‍යතාවය තුළින් ගොඩනැගී තිබේ.

1. රාජ්‍යයක් යනු පරමාධිපත්‍යය සහ ජාතිකත්වය මත, නිශ්චිත භූමි ප්‍රදේශයක් ද, ආණ්ඩුවක් ද සහිතව සංවිධානය වී තිබෙන, දේශපාලන ප්‍රජාවකි. ජාතිය යනු එම පොදු සංස්කෘතික සහ දේශපාලන අනන්‍යතාවක් සහිත එම දේශපාලන ප්‍රජාව හඳුන්වන තවත් සංකල්පයකි. ජනවාර්ගිකත්වය යන්නෙන් අදහස් වන්නේ, එම ජාතික රාජ්‍යය ඇතුළතම සිටින, තමන්ගේම වෙනස් සංස්කෘතික අනන්‍යතා සහිත උප – ජාතික කණ්ඩායම් ය.

• රාජ්‍යයේ සාමාජිකයන් පුරවැසියන් ය. එසේම පුරවැසියෝ ජාතියේ සාමාජිකයන් වශයෙන් ද සළකනු ලැබෙති.

1. රාජ්‍යය තුළ එහි සාමාජිකයන් වශයෙන් ජීවත් වන විවිධ ‘ජනවාර්ගික ජනවාර්ගික කණ්ඩායම්’ ජනවාර්ගිකත්වය ලෙස දැක්වේ.

1. සාමාන්‍යයෙන් වාර්ගික කණ්ඩායම් සතු ඔවුන්ගේ ම වූ භාෂා, ආගම් සහ සංස්කෘතීන් පවතීන බැවින් ඔවුන්ට වෙනම අනන්‍යතාවයන් සතුවෙයි.

1. රාජ්‍යයක් තුළ ‘ජනවාර්ගික කණ්ඩායම්’ කිහිපයක් ජීවත්ව සිටිය හැකිය. ඔවුහු ජාතිය වශයෙන් හඳුන්වන වඩාත් පළල් දේශපාලන ප්‍රජාවට අයත් විවිධ ජනවාර්ගික අනන්‍යතා කණ්ඩායම් වෙති.

• පොදු ජාතිකත්වයක් පිළිබඳ අදහස ගොඩ නැගෙනුයේ විවිධ ජනවාර්ගික ප්‍රජාවන්ගේ දේශපාලනික එක්සත්භාවය තුළිනි.

• තමන්ටම අයත් අනන්‍යතා සහිත ජනවාර්ගික කණ්ඩායම් කිහිපයක් තුළින් ගොඩනැගෙන ජාතියක් වසන රාජ්‍යයන් බහුවාර්ගික රාජ්‍යයන් වශයෙන් හඳුන්වනු ‌ලැබේ. ශ්‍රී ලංකාව, ඉන්දියාව, මහා බ්‍රිතාන්‍යය, පකිස්ථානය, ඇමෙරිකාව ආදිය උදාහරණ වෙති.

නිගමන :

ඉහත විෂය කරුණු සහ තර්කවල කෙටි සාරාංශයක් ඉදිරිපත් කරමින් පහතසඳහන් නිරීක්‍ෂණය වැනි නිරීක්‍ෂණයන් ගොඩ නැගිය හැකිය: නූතන බහුවාර්ගික සමාජ වල විවිධ ජනවාර්ගික කණ්ඩායම් අතර ජාතික ඒකත්වය ගොඩ නැගීම රාජ්‍යය සතු විශේෂ කාර්යභාරයකි. සන්ධීය ක්‍රමය, බලය විමධ්‍යගත කිරීම සහ පරිපාලනය විමධ්‍යගතකරණය ඒ සඳහා ඇති ආණ්ඩුක්‍රම ව්‍යවස්ථාමය විකල්ප වේ.

සටහන:

ශ්‍රී ලංකාව හෝ වෙනත් සමාජයන් තුළ රාජ්‍යය, ජාතිය, ජනවාර්ගිකත්වය සහ ජතිකත්වය සම්බන්ධයෙන් ඇති වී ඇති වර්තමාන සංවර්ධනයන් පිළිබඳව යම් අවබෝධයක් මෙම පිළිතුරෙන් අපේක්‍ෂා කෙරේ. උදාහරණ සහිතව එවැනි අවබෝධයක් ප්‍රදර්ශනය කරන අපේක්‍ෂකයන්ට අතිරේක ලකුණු ප්‍රදානය කළ හැකිය.