 |
සටහන-අමිල උඩවත්ත
තෙවැනි බුවනෙකබාහු රජු සම්බන්ධයෙන් තොරතුරු සඳහන් කරන බොහොමයක් මූලාශ්‍රයවල ඔහුට වන්නි බුවනෙකබාහු යන නම ද දී ඇත්තේ ය. මීට පෙර සිටි රාජ වංශ හා මේ රජු අතර සබඳතාවක් පැහැදිලි කරන්නට හැකි මූලාශ්‍ර කිසිවක් හෝ හමු නොවීමත් මේ රජු වන්නි බුවනෙකබාහු නමින් හැඳින්වීමත් අනුව අපට සිතිය හැකි වන්නේ මේ තෙවැනි බුවනෙකබාහු වනාහී වන්නි රජවරුන් අතරින් අයෙකු මිස මෙතෙක් පැවති රජ පරපුරකට අයත් නොවේ ය යන්නයි. ඇතැමුන් සඳහන් කරන්නේ මේ වනාහි බෝදා මහපාණන් යනුවෙන් කැරලි ගැසූ පුද්ගලයා බව යි. හේ වන්නි රජෙකු වියහැකිය යන මතය ද ඒ සමග ම ඉදිරිපත් වී තිබේ. කුරුණෑගල හා වන්නි හත්පත්තුවේ පාරම්පරික කතා කිහිපයක වන්නි විජයබාහු නම සඳහන් වේ යැයි ලංකා විශ්විද්‍යාල ලංකා ඉතිහාසය කෘතියේ සඳහන් වෙයි. කුරුණෑගල වැව මේ රජු විසින් කරවන ලදැයි විශ්වාසයක් පවතී.
තෙවැනි බුවනෙකබාහු රජුට පසු බලයට පත්වූයේ පස්වන විජයබාහු හෙවත් සවුළු විජයබාහු ය. සවුළු යන්නෙන් එම පවුලේ නින්දගමක නම දැක්වේ යැයි ඩී. බී. ජයතිලක මහතා සඳහන් කරයි. ඔහු ඇතැම්විට පොළොන්නරුවේ මහා පරාක්‍රමබාහු රජ පරපුරට ඥාති වේ යැයි සිතියහැකි නමුදු එය එතරම් විශ්වාස කටයුතු මූලාශ්‍රයකින් තහවුරු වී නැත. මෙතුමා වර්ෂ 11ක් පමණ පාලන බලයේ සිටින්නට ඇත. ඒ කුරුණෑගල මුල්කරගෙනය.
 |