ගෝදාවරි

දකුණු ඉන්දියාවට අයත් ප්‍රධාන ගංගාවකි. අස්මක රාජ්‍ය මේ නදී ආශ්‍රිතව ස්ථාපනය වී තිබුණි. ගංගාව ඇරඹෙන්නේ දකුණු ඉන්දියාවේ බටහිර දිග උස්බිම්වලිනි. පසුව එන තැනිතලා බිමක් ඔස්සේ ගලාගොස් නැගෙනහිර ඝාට්ස් කඳු අතරින් මුහුදට එක්වේ. ගෝදාවරී නදියෙන් පහළ ක්‍රිෂ්ණ නදිය දක්වා භූමිය ඉතා සරුසාර භූමියකි.නැගෙනහිර චාලුක්‍යයන් සිය බලය පතුරුවාගන්නේ මේ ප්‍රදේශ ආශ්‍රිතවය.  පිෂ්ටපුරය, පෝතාලි ආදී නගර මේ ගංගාව ආශ්‍රිතව වර්ධනය විය. සමුද්‍රගුප්ත අධිරාජයාගේ යුධ ව්‍යාපාරය තුළ හමුවුණු මහේන්ද්‍රගිරි නම් පාලකයා සිටියේ මේ පිෂ්ටපුරයේය.

මෞර්ය පරිහානියට පසු ඩෙකෑනයේ බලයට පත්වන සාතවාහනයෝ ද ගෝදාවරී ප්‍රදේශය මුලකරගත් පිරිසකි. ඔවුන්ගේ පාලන මධ්‍යස්ථානය වූයේ ප්‍රතිෂ්ටානයයි. වර්තමානයේ එය පයිතාන් නමින් හැඳින්වේ. උදේනිය හරහා දකුණු ඉන්දියාවට යන්නෙකුට ගෝදාවරී නදීබඩ පයිතාන් නගරය හරහා ගමන් කිරීමට සිදුවේ. ගෝදාවරී නදියට පහළින් කළ කැණීම්වලදී සාතකර්ණීවරුන්ගේ කාසි හමු වී තිබේ. හිතෝපදේශයේ කතා අතර ද ගෝදාවරී නදිය හමුවේ.