ත්‍රිභාෂා ලිපිය-ගාල්ල

මෙම ලිපිය 15 වන සියවසේ මුල දී පමණ යුං ලෝ නම් චීන අධිරාජයාගේ නියෝජිතයෙතු වශයෙන් ලංකාවට ආ චෙං හෝ විසින් පිහිටුවන ලදී. චීන, දෙමළ හා පර්සියන් භාෂා වලින් මෙය රචනා කර තිබේ. චීන බසින් ඇති කොටසේ ඇති ආකාරයට චීන අධිරාජ්‍යයා රත්තරන් කැබලි 1000ක් හා රිදී කැබලි 5000ක් ද, විවිධ වර්ග වලින් සමන්විත සිල්ක් රෙදි තොග 50, මාණික්‍යයන්ගෙන් අලංකාර කළ පතාක 4ක්, තඹවලින් නිමැවූ පහන් ධාරක 5ක්,  තඹ වලින් නිමැවූ ඉටිපන්දම් ධාරක යුගල 5ක්, රන්මුවා නෙළුම් මල් යුගල 6ක් ඉටිපන්දම් යුගල 10ක්, සුවඳ කූරු 10 ක් යන​ පඬුරු ලංකාව වෙත එවා තිබේ. මීට අමතරව ශ්‍රී පාදස්ථානයේ දී කළ පූජා කර්මයක් ගැන ද චීන බසින් කොටසෙහි සදහන් වේ.

මෙම ලිපියේ දෙමළ කොටස සිංහලයට පරිවර්තනය කළ සෙනරත් පරණවිතාන මහතා පවසන්නේ, තත්කාලීන චීන අධිරාජයා වූ  යුං ලෝ අධිරාජ්‍යයාගේ රාජ්‍ය පදවිප්‍රාප්තියෙන් හත්වෙනි වර්ෂයේ දෙවෙනි මාසයේ දී මේ පූජා වස්තූන් ලංකාවට එවා ඇති බව යි. ලංකාවේ දෙවුන්දර විෂ්ණු දේවාලයේ අනුහස් පිළිබඳ අසා  මේ පූජා වස්තූන් එවූ බවයි. ඒවා එවා ඇත්තේ චිං වෝ සහ උවිං චුවිං යන තානාපතිවරු දෙදෙනා අත බව ද වැඩිදුරටත් එමකොටසේ සදහන් වේ.

පර්එසියානු බසින්හි රචිත කොටස් බොහෝ සෙයින් පරිහානියට පත්ව ඇති අතර එම කොටසේ් අල්ලාහ් දෙවියන් උදෙසා සිදුකරන ලද පූජාවක් පිලිබඳ සඳහන් වේ.

චීන මූලාශ්‍රවලට අනුව බැලූ කල පෙනී යන්නේ චෙං හෝ 1405 වසරේදී මෙරටට පැමිණි බව ය. එහෙත් මෙම සෙල්ලිපියට අනුව ඔවුන් පැමිණ ඇත්තේ 1403 වසරේදී ය.